MAHUSIANO YA KIMAPENZI YASIYO NA TIJA KATIKA MAISHA YA VIJANA WENGI WA KARNE YA 21 WANAOONGOZWA NA TAMAA ZA NGONO

MAHUSIANO YA KIMAPENZI YASIYO NA TIJA KATIKA MAISHA YA VIJANA WENGI WA KARNE YA 21 WANAOONGOZWA NA TAMAA ZA NGONO.

Na Mwl Juma

Mtunzi wa Makala

Rununu: +255762957992

Moshi-Tanzania

Kipindi cha mwanzo wa ujana kimekuwa ni tatizo kubwa miongoni mwa vijana wengi wa kidijitali yaani wa kiume na wa kike katika karne ya 21. Hii inatokana na mabadiliko ya kihisia, kiakili na kimwili yanayoisibu miili ya vijana wengi. Mabadiliko haya huchochewa kwa kasi na mazingira yanayowazunguka ikiwemo ulaji wa vyakula chochezi vya ukuaji wa mwili, akili na hisia za miili yao hasa vyenye protini, fati na madini ya vitamini B complex kwa wingi. Vichochezi hivi visipozingatiwa vizuri kwa umakini wake kuleta maendeleo chanya katika ukuaji wa miili ya vijana, husababisha matokeo hasi miongoni mwa vijana ikiwemo ubakaji, kuanzisha mahusiano ya kingono yasiyo na tija kwa kufuata mihemko ya hisia, mabadiliko ya kitabia hasa zisizokubalika kwa wanajamii, kupata mimba zisizotarajiwa ambazo zinasadikiwa ndizo chanzo kikuu cha ongezeko na wimbi kubwa la watoto wa mitaani na kadhalika.

Wavulana wanapoanza kubalehe na wasichana kuvunja ungo ndiyo mwanzo wa ujana wao. Kipindi hiki ni cha hatari kwani vijana wengi wa kike na wa kiume hutaka kujua mambo kwa vitendo na si nadharia pale ambapo hisia za kufanya ngono zinawaka katika miili yao ikiwa ni pamoja na kupiga punyeto, kujamiana, kubeba ujauzito, kuanzisha mahusiano hasa ya jinsia tofauti, kutaka kujua namna ya kuridhishana kingono na jinsi ya kutumia njia za kuepuka kubeba ujauzito (contraceptives). Kujaribu kufanya jambo pasina uwelewa wa kutosha na mipango ni hatari.

Chukulia wewe ni dereva unayebeba abiria na ikatokea ukanibeba ndani ya gari lako kunitoa pointi A kwenda pointi B, lakini tukiwa barabarani mara ukaona taa nyekundu za barabarani zimewaka ghafula ukasimamisha gari nikakuuliza kwanini umesimamisha gari? Ukanijibu kuwa “kwa sababu taa nyekundu za barabarani zimewaka, na huwa ninasimamisha gari nikiona taa nyekundu zimewaka”. Baadaye simu yako ikaita ukaichukua ukaipokea. Nikakuuliza kwanini umepokea simu? Ukanijibu kuwa “nimeipokea kwa sababu imeita”. Papo hapo ukaanza kujishangaa ukijisemea “mimi ni mpumbavu kiasi gani”.  Lakini mimi ni mpumbavu kama unavyofikiri? Je, mara zote unasimama gari unapoona taa nyekundu zimewaka?  Na kupokea simu ikiita? Je, hujawahi kuzigonga taa nyekundu kwa makusudi na ukadai ni bahati mbaya? Je, mara kwa mara hujawahi kutokupokea simu ulipoisikia ikiita kwa sababu za kudai uko bize unafanya mambo yako ya msingi?

Hakika siwezi kuilaumu taa nyekundu iliyowaka wala simu iliyoita kwani hazikufanyi usimame au kupokea simu, ikumbukwe pia hazitusababishi tusimame wala kupokea simu inayoita. Tunasimama kwa sababu sote tumebeba vitu ndani yetu shauku yenye uwezo kufanya yote tunayoweza tubaki tukiendelea kupumua katika uso wa dunia tambala linaloanikwa kila kukicha lakini ndani yake limejaa kiwewe. Tunapokea simu pindi iitapo kwa sababu wengi wetu pia tuna shauku yenye nguvu inayotufanya tuongee na yeyote aliye tayari kuongea na sisi.

Hebu fikiri kuhusu uwezekano wa kuigonga taa nyekundu au kuiacha simu iite wakati huo upo nyumbani peke yako bila kazi yoyote na itakuwa wazi kuwa kinachokufanya ufanye jambo fulani kipo ndani yako na si nje yako.

Hakuna chochote tunachokifanya kinasababishwa na vinavyotokea nje yetu. Kama tunaamini kwamba kile tunachokifanya kinasababishwa na nguvu ama visababishi vilivyo nje yetu hakika tunajifanya kama mashine zilizokufa na si watu tunaoishi. Kwa sababu tunaishi, tunaweza kuchagua kujibu ama kutokuijibu simu inayoita bila kujali inatimiza lengo kwa wakati huo.

Vijana wengi wa kiume na wa kike katika karne hii ya 21 wamekuwa na shauku ya kumiliki wapenzi (girlfriends/boyfriends) kwa sababu ya tamaa zinazowaka ndani ya miili yao. Hawako tayari kupuuzia kuona taa zinawaka na wao wakiwa bize wakiendesha magari yao pasipo kusimama na badala yake hubakia wakijitetea kwa maneno yanayopeperushwa kwa kuelekea katika ombwe lisilo na tija yoyote kuwa eti wamesimamisha magari kwa sababu taa nyekundu zimewaka.

Baadhi yao hasa vijana wa kiume wanadiliki kununua viwanja kila mahali wapitapo wasivyovianzishia ujenzi na kuviacha vikiwavutia nyoka na fumo(wanyama wadogowadogo jamii ya paka wanaochimba mashimo ardhini kama sehemu ya kuishi) kujianzishia makazi yasiyo rasmi. Vijana hao wamekuwa wakiahidi kuwa viwanja vyao ipo siku watavianzishia ujenzi lakini cha kushangaza hawana mipango yoyote madhubuti kutekeleza wanayowaahidi wauzaji wa viwanja.

Watu huwajia wakihitaji viwanja kwa ajili ya kujenga mijengo ya maana wakiwa na raslimali kedekede ikiwa ni pamoja na matofali, madumu ya rangi yaliyojazwa hadi pomoni, mifuko ya saruji, vigae (tiles), mabati ya kisasa na vitu vingine vingi kupendezesha vyumba watakavyovijenga. Lakini cha ajabu hawapati viwanja na waliovimiliki hawana hata tofali moja la sampuli.

Hivyo, ewe kijana kama unahitaji kuwa na mpenzi jipange uwe na malengo usiwe ndiyo chanzo kikubwa cha kukatisha ndogo za vijana wa kike ambao tumekuwa tukiwaahidi tutawaoa na kuboresha maisha yao siku za usoni lakini wakati huo hatuna mpango wowote wa kuishi nao na kubakia tukiwafanya mithili ya majamvi ya wageni yanayojaribiwa kama yanakidhi haja wa watumiaji au la. Hii ni hatari sana kwani matokeo yake ni kuzaa watoto tusiowatarajia katika maisha yetu kwani uwepo wao wengi wetu tunawachukulia wamezaliwa kwa bahati mbaya na kuwatelekeza pasipo kuwapatia huduma za msingi ambazo ni haki zao kama binadamu wengine.

Nchini Tanzania, takwimu zinaonesha kuwa karne hii ya 21 kumekuwa na wimbi kubwa na ongezeko wa watoto wa mitaani ambao haijulikani wazazi wao ni akina nani. Wengi wao wamezaliwa kama matokeo ya mahusiano yasiyo na tija yaliyolenga kutibu hisia na mihemko tu bila kujali matokeo yake miongoni mwa vijana wa kike na wa kiume wanaowaka tamaa katika miili yako na kujiingiza katika ngono zisizo na malengo chanya kwa maisha ya baadaye.

Ewe mtu wangu wa nguvu, lengo la makala hii ni kutuelimisha sote vijana na kutusaidia kufanye maamuzi thabiti na malengo yenye tija yatakayowasaidia watoto wetu ambao ni kizazi kijacho kitakachosimamia maadili na ustawi wa jamii. Muda utafika tutatoweka sote na watakao baki ni watoto wetu na kama tumewapandikizia mbegu ya chuki ya kutowalea vizuri ikiwemo kuwatelekeza baada ya kuwazaa italeta athari hasi kwa kizazi kijacho kinacholimbikiza chuki kwa wazazi wao wasio na fikra chanya kwa maendeleo yao. Ikumbukwe kuwa tabia ya mtoto kama ni mbaya inatokana na malezi ya wazazi waliokurupuka kuzaa bila kuwa na mipango ya kulea watoto wao.